De säks'sche Lorelei

Ich weeß nich, mir isses so gomisch

un ärchendwas macht mich verschtimmt.

Es iss meechlich, das is anadomisch,

wie das ähmd bei Mänschen oft gimmt.

 

De Älwe, die bläddschert so friedlich,

ä Fischgahn gommt aus dr Tschechei.

Drin sitzt 'ne Familche gemiedlich,

nu sinse schon an dr Bastei.

 

Un ohm uffn Bärche, nu gugge,

da gämmt ich ä Freilein ihrn Zobb.

Se schtriecheltn glatt hibbsch mit Schbugge,

dann schtäcktsn als Gauz uffm Gobb.

 

Dr Vader da unten im Gahne

glotzt nuff bei das Weib gans entzickt.

De Mudder meent draurich: "Ich ahne,

di macht unsern Babbah verrickt".

 

Nu fängt die da ohm uffn Fälsen

zu sing ooch noch an ä Gubbleh.

Dr Vadder im Gahn dud sich wälsen

vor Lachen un jodelt: "Juchheh".

 

"Bis stille", schreit ängstlich Ottilche.

Schon gibbelt gans forchtbar dr Gahn,

un blätzlich versinkt de Familche...

Nee, Freilein, was hamse gedan!